انا ابن مين

مصر امى يا ست الكل ممكن اقولك كلمتين بس كلمتين انا ابن مين

هو انا صحيح ابنك ؟ وانتى امى ولا انا طفل لقيط ولا فى غفله من الزمن جيت متخبيش
خلاص انا كبرت وبقى عندى 22 سنه وبقيت فاهم كل حاجه وشوفت بما فيه الكفايه اكيد انا مش ابنك انا متاكد ولو كنت
ابنك احب اقولك ليه بتعملى فى ابنك كده؟

هو انا مش زى ابنائك التانيه ولا هما المدلعين ؟؟

ماما هو انتى مش بتحبينى .. طب ليه؟ هو صحيح انت عملتى توكيل لولادك
التانيه يبيعوا كل اللى نملكه من غير حتى ما يدونى حاجه هو مش انا ابنك زيهم

لا متقوليش عليا ابن جحود صحيح كتر خيرك
شربتينى من نيلك الملوث واكلتينى من خيرك المسرطن بس مشبعتش ياماما زى وزى اخواتى اللى زيي
بتقولى اغنيلك ..اغنيلك !! اقولك ايه اشكيلك طب ما انتى عارفه انا عايز ايه وشايف ايه وبعانى من ايه وانتى السبب ومش عارف ليه .. اه مشيت فى شوارعك بس مش لانى بحبها لا علشان معنديش حل تانى حتى الميكروباص
مبقتش عارف اركبه عارفه يا ماما ليه ؟؟ علشان ابنك عز غلى اسعار السولار فالاجره بقت
نار وانا مصروفى اللى باخده منك فى اليوم يا مصر ااقل من دولار

نعم يا ماما بتقولى ايه .. استحمل استحمل ايه وليه ولحد امته اه .. اه يا ماما عارف ربنا يفرجها هو ده اللى قديرتى عليه

طب شكرا يا ماما