بدور على شغل

بعد صباح الخير لو احنا دلوقت الصبح وبعد مساء الخير برده لو كنا دلوقت بالليل

بدور على شغل دى بقت كل شغلنتى الايام اللى فاتت واللى دلوقت و اللى جايه حسب توقعات جميع العرافين وبتاعو البخت وبتاع الابراج وبما اننا فى زمن الكوسه او الزمن اللى الناس كلها بتدور فيه على شغل
اللى بيدور على اول شغلانه
واللى شغال شغلانه وبيدور على واحد تانى علشان الاولنيه يا دوب بتأكله عيش حاف لو عرف يجيبه من الفرن

المهم بقى المنظر العام بتاعى فى الشارع بتاعنا انهم اتعودوا عليا شايل الورق بتاعى رايح فين رايح ادورعلى شغل جاى منين كنت بدور على شغل فاضى بكره ؟؟ لا والله اصلى رايح ادور على شغل وكل يوم الصبح اصحى من النوم اشرب الشاى بلبن بتاعى وانزل من البيت وانا بقفل الباب ورايا اسمع ماما بتقولى روح يا بنى ربنا يوقفلك ولاد الحلال مش عارف ليه من كتر ما سمعت الجمله دى بقيت بشك فى كل واحد أقدمله ورقى واقول يا ترى ابن حلال ؟؟؟؟؟؟؟؟

وكل مره اروح لواحد ابن حلال يوقفلى فعلا يوقفلى بس يوقفلى زى الحيطه اللى فى اخر الحاره السد ويحطلى العقده فى المنشار لا ياريت دا بتاخد منى العقده والمنشار

ويقولى فوت علينا بكره ... بكره ؟؟؟

لا يا حبيبى اول الشهر وفى يوم قولت لأبن الحلال ده ما النهارده يا حضرت اول الشهر نزل كوبايه الشاى اللى كان رافعها ولسه ...........وقالى يبقى اول الشهر الجديد بس من بدرى

ماشى يا ابن الحلال المشكله ان كل يوم اسمع ان الريس وعد ب 40 مليون فرصه عمل هى فين

بقى انا ازاى بقى مش لاقى شغل مش عارف انا اكتر واحد دلوقت بينفع الجرايد واخلص الجرايد اللى فيها وظايف اجيب الوسيط اخلص الوسيط ادخل على النت بس هو ده كل اللى بعمله يعنى هو مش مجهود كبير قوى بس مجهود طالع مش فى الشغل فى التدوير على شغل تصدق شب زى مثلا اروح اقدم على شغل فى شركه بترول فى الاسكندريه انا قولت خليك ماشى فى السكه دى علشان المخزون بتاع مصر من الغاز والبترول هيخلص وهما دلوقت عايزين ناس كتير علشان محدش ضامن الظروف والله مش عايز ابقى مهندس ولا طالب 10000 جنيه مرتب انا كل املى ان اشتغل ولما روحت قالولى ابعتلنا ورقك فى البريد ورقى فى البريد حاضر المهم وانا خارج الفراش الله ....... بيته بيقولى اجيبلك المفيد يا استاذ قولتله تبقى ريحتنى قالى هو الاستاذ ............ بيه لو روحتله هيعينك على طول وده بيحب يخدم الشباب قوى قوى قوى قولتله كتر خيرك قوى والله وليك الحلاوه قولتله طب وايه المطلوب قالى 17 قولتله 17 ايه قالى هيكونوا 17 ايه 17 الف جنيه17 الف جنيه علشان اشتغل عامل فى شركه امال لو طلبت اشغل صاحب الشركه ادفع كام انا لو معايا 17 الف جنيه كنت روحت دفعتهم لواحد سمسار عنده مركب موت صغيره كده واشد انا وهو وملك الموت على اطاليا االحاجه الغريبه قوى قوى قوى موضوع الفيش الجنائى بقيت وجه معروف فى مديريه امن اسكندريه كل ما احب اقدم فى شغلانه يقولولى روح اعمل فيش بأسم الشركه اقولهم انا معايا واحد طازه ومقدمتش بيه فى الشركه اللى فاتت ولو حصل نصيب ابقى اروح اعملك واحد لا روح اعمل فيش اروح اعمل فيش ويطلع مفيش شغل احطه جنب اخواته

انا نازل ادور على شغل